De 14. Februar 1912 ass d'Walfer Musek an d'Liewe geruff ginn. Bei der éischter Versammlung de 15. Februar 1912 hate 25 Unhänger vun der Musek sech zesummegesat an deen éischte Comité gewielt. Präsident war de Jean Wolff an Dirigent war de L. Wigleb, deen och nach Member vun der Harmonie des Caves E. Mercier & Cie war.
Den 8. Oktober 1913 huet de Comité eng Demande bei der Großherzogin Marie-Adelaïde gemaach fir der Walfer Musek follgenden Numm ze ginn: "Marie-Adelaïde - Fanfare von Walferdingen". Mat engem Schreiwen vum 30. November 1913 huet d'Großherzogin hiren Accord ginn.
Am Schlass zu Walfer, fréier groussherzoglech Residenz, war eng Militärklinique ageriicht. Den 20. Abrëll 1919 hunn sech 10 Membere vun der "Military Band" de Walfer Museker fir e Concert ugeschloss.
De 26. Juni 1921 hunn d'Großherzogin Charlotte an de Prënz Felix d'Musek an de Schlasspark op Colmar-Berg invitéiert fir en ëffentleche Concert ze spillen.
Am Joer 1924 huet de Comité fir 6.750 Frang e Gebai kaf fir e Musekssall anzeriichten, deen och mat vill Hëllef vun de Musikanten an och der Gemeng zustane komm ass.
Am Joer 1937 ass d'Walfer Musek dunn och an der UGDA als Member opgeholl ginn. De 4. Juli 1937 ass dat 25-järegt Jubiläum gefeiert ginn an et gouf e neie Fändel.
Bei engem éischten nationale Concours am Joer drop gewënnt d'Fanfare vu Walfer den éischte Präis vun der "lecture à vue" a vun der "exécution".
Ënnert dem Naziregimm uerdert den "Stillhaltekommissar" d'Opléisung vun alle Veräiner. Dat huet och d'Enn vun der Fanfare vu Walfer bedeit. D'Museksinstrumenter hu missen der däitscher Verwaltung ofgi ginn.
Nodeems déi däitsch Truppen endgülteg d'Land verlooss hunn erwächt dat gesellschaftlecht Museksliewen erëm. Vun de 60 Membere virum Krich versammelen sech der 45 den 11. Abrëll zur éischter Generalversammlung no der Befreiung. Véier jonk Museker hunn hiert Liewen am Krich verluer.
Den 23. September 1945 huet d'Musek hire Fändel erëmkritt, deen am Krich beschlagnamt gi war. An och an deem Joer huet d'Prinzessin Marie-Adelaïde, Niece vun der 1924 verstuerwener Großherzogin, d'Patronat vun der Walfer Musek ugeholl.
1949 hunn d'Musikanten hier éischt Uniforme kritt.
1962 ass dann dat 50-järegt Jubiläum gefeiert gi mat engem Galaconcert an engem neie Fändel. Mat 43 Musekantinnen a Musekante gëtt weiderhin un enger Rei Concoursen Deel geholl.
Den 28. Dezember 1968 gëtt e neie Musekssall ageweit.
Am Joer 1983 huet d'Musek déi éischt Schrëtt fir en Harmonie-Ensembel gemaach.
Ënnert der Leedung vum Jean Schammo grënnen e puer Blechbéiser eng "Strëpp", déi méi spéit "Walfer Schlassbléiser" genannt gëtt.
Am Mee 1987 sinn da 75 Joer gefeiert ginn an aus der Fanfare ass eng Harmonie ginn. Vun elo un ass et d' "Harmonie Grand-Ducale Marie-Adélaïde".
Am Joer 2012 sinn dann 100 Joer Walfer Musek gefeiert ginn. Highlight war e grousse Concert Gala de Centenaire zesumme mat der Fanfare Hielem-Luerenzweiler, der Fanfare Lëntgen, der Harmonie Steesel an der Harmonie Miersch, souwéi der Luxembourg Pipe Band.
An der ongewësser Zäit duerch d'Coronapandemie huet d'Walfer Musek virtuell zesumme musizéiert. Soubal et erëm méiglech war hu mir eis erëm ënner Restriktioune getraff fir zesummen kënnen ze spillen.
Haut si mir eng dynamesch Equipe vun ongeféier 40 motivéierte Musikantinnen a Musikanten.
Téléchargez l'historique en détail.